Þú ert hér

Fá sendar tilkynningar Loka

Með því að skrá netfang þitt hér getur þú fengið sendar á tölvupósti nýjustu greinar og kveðjur þegar þær eru skráðar á viðkomandi.

Björn Jónatan Emilsson

f.d. 28.5.1934 - d.d. 13.11.2014
Pabbi var fæddur 28. 5. 1934 á Eskifirði, sonur Níelsar Emils Weywadts Björnssonar og Laufeyjar Jónatansdóttur, og var yngstur 4 barna sem þau eignuðust, en hin voru Ingvar Emilss., f. 1926, hafrannsóknarfræðingur í Mexíkó, Bryndís Emilsd., f. 1928, og lést 2002, Huldu Emilsd., f. 1930, búsettri í Kirkland, WA, USA. Þegar hann var 6 ára fluttist fjölskyldan til Reykjavíkur og ólst að mestu upp á Seljavegi, og faðir hans reri þar til fiskjar, meðfram starfi sínu, að setja sýslumenn í embætti. Pabbi fór í Verslunarskólann, en fannst hann þó alltaf skorta náttúrufræðikunnáttu og vildi að börn hans næmu meira í slíku. Hann hóf vinnu á lager herstöðvarinnar á Heiðarfjalli, Langanesi og þar kynntist hann mömmu, Þórunni Jónsdóttur, f. 13. 10. 1934, að Hrollaugsstöðum, norðan fjallsins. Þau fóru til Darmstadt, Þýskalandi, því pabbi hóf nám í byggingatæknifræði og greiddu fyrir dvölina með vinnutekjum og frímerkjasölu. 3 börn fæddust á námstímabilinu, Emil, 1957, Birgir Örn, 1959 og Katrín, 1961, og 2 seinna, Björn Þór, 1965, og lést 2009, og Einar, 1966, og ólumst við upp við sjóinn, að Þinghólsbraut 53, Kópavogi og síðar að Kársnesbraut 59. Pabbi stofnaði teiknistofu að Laugavegi 96 og Byggingatækni sf með félögum sínum, um 1965, og byggðu þá 8 hæða fjölbýlishús fyrir vestan Holtagarða, með gömlu trémótauppsláttaraðferðinni, en buðu svo lægst í fjölbýlishús sem Framkvæmdanefnd byggingaráætlunar áætlaði að byggja í Breiðholti, því vildu nota meiri fjöldaframleiðslubyggingaaðferðir, en áður þekktust hérlendis; stofnuðu þá fyrirtækið Breiðholt hf; fluttu inn þýsk stálmót og rafmagnskrana, sem fóru eftir teinum meðfram byggingunum og keyptu notaða steypuverksmiðju því dýrt var að aka með vatnsblandaða steypu frá neðri svæðum borgarinnar. Vegna lágs byggingakostnaðar var menningarmiðstöðin Gerðuberg gefin borginni, af Framkvæmdanefndinni. Kranarnir og stálmótin voru síðast notuð í Mosfellsbæ, fyrir hrunið, 2008. 1973 hætti pabbi hjá Breiðholti hf, og hóf, ásamt með öðrum sem höfðu umboð fyrir Butler stálgrindarhús, að byggja Coca-Cola verksmiðjur í Nígeríu og hann hannaði ´cross ventilation´ starfsmannahús, en sökum mútugreiðslna frá öðrum fyrirtækjum fengu þeir ekki mikil verkefni þar, og hann vann á Teiknistofunni að Laugavegi 96 og sjálfstætt, það sem eftir var ævinnar, m. a. við skipulagningu sumarhúsabyggðar að Kolsstöðum, Borgarfirði. Býlið Fífustaði, Arnarfirði keypti hann 1973, þar sem við systkinin fimm unnum á sumrin við búskap og fiskveiðar í 10 ár. Hann varð bráðkvaddur á Landspítalnum.
Eilífur Emil Björnsson

Dánartilkynning Lesa grein

Björn Jónatan Emilsson fæddist á Eskifirði 28. Maí 1934. Hann lést 13. nóvember 2014.

Minningarorð Lesa grein

“Þú ert búinn að eignast lítinn bróður” sagði Emilía föðursystir okkar við mig á vordögum árið 1934. Við áttum heima á Eskifirði en hún frænka okkar og hennar fólk á Reyðarfirði, og þangað var ég sendur þegar svona stóð á fyrir fjölskyldu okkar.
Þessi nýi bróðir dafnað vel og var með afbrigðum hraustur. Móðir okkar, Laufey, kallað hann Ghandi, því að hann var holdgrannur mjög og að þessu leiti líkur frelsishetju Indlands, sem á þessum árum barðist fyrir að koma landi sínu undan oki Breska Heimsveldisins.
Árin liðu við Grjótána á Eskifirði, en aðal leikvöllur okkar krakkanna voru bryggjurnar, nokkuð sem olli foreldrum okkar talsverðum áhyggjum og ekki að ástæðulausu, því að einn góðan sumardag var komið heim með Björn Jónatan holdvotan og slæptan. Hann hafði verið að leika bílstjóra og bakkað niður um gat á Framkaupstaðarbryggjunni. Þar höfðu sjómenn verið að gera að fiski en gleymt að loka slorgatinu. Enginn fullorðinn var nálægur þessa stundina en leikfélagarnir æptu á hjálp, “hann Bjössi datt niðrum gatið!” og eftir nokkurn tíma kom maður að og honum tókst að draga Bjössa upp um gatið. Þá segir drengur “ég var heppinn að missa ekki stýrið mitt”. Þessi verðmæta eign var hjól af gömlum barnavagni. Guð var lofaður fyrir að þetta leikfang hefði ekki dregið þennan holdgranna snáða niður í djúpið.
Heimskreppan stóð sem hæst á þessum árum. Spánverjar og aðrir kaþólskir höfðu ekki efni á að kaupa saltfiskinn fyrir lönguföstuna. Saltfiskur var ein aðalframleiðsla fiskiþorpanna á Íslandi og við höfðum þess vegna ekki ráð á að kaupa suðræn aldin og annan innfluttan varning. Fátæktin varð geysileg og sem aldrei fyrr herjaði berklaveikin, einkum á unga fólkið, og lömunarveiki , en allt þetta heyrir þetta nú sögunni til og unga fólkið í dag tekur alla velferðina sem gefna . Aldrei hafi orðið aðrar eins tækniframfarir í mannkynssögunni eins og á þessum 80 árum frá fæðingu Björns Jónatans.
Hernámsárið, 1940, fluttum við til Reykjavíkur. Þar var ömurlegt um að litast, opnir hitaveituskurðir og hermenn víðs vegar. Faðir okkar flutti séttuna sína að austan og hún var geymd í Selvörinni. Við veiddum rauðsprettu, þaraþyrskling og rauðmaga í víkinni milli Seltjarnarness og Akureyjar-grandans. Björn fór í Miðbæjarskólann; Verslunarskólann og að lokum til Darmstadt í Þýskalandi, þar sem hann lærði húsahönnun og byggingatækni . “Skriðmótatæknin”, sem hann innleiddi hérlendis, gerði veggina rennislétta; hann og Hrafnkell Thorlasíus arkitekt aðstoðuðu breska arkitektastofu við að hanna verslunarmiðstöðina Kringluna; þeir endurskipulögðu Vestmannaeyjabæ, eftir gosið, og hann hannaði fjölda ein- og fjölbýlishúsa. Hann var listaskrifari og –teiknari og neitaði að nota teikniforrit eins og CAAD.
Með Fóstbræðrum fór hann í söngferðir víða um lönd, löngu eftir að jafnaldrar hans voru horfnir úr kórnum og voru búnir að missa söngröddina.
Við hér í Mexíkó sendum afkomendum hans, sem og öðrum nánum ættingjum, okkar innilegustu samúðarkveðjur.
Ingvar Emilsson
Byggir á Summit vefstýrikerfinu frá IGM ehf. www.igm.is